एन्निभर्सरी ट्रेक

 यात्रामा कोहि धेरै अघि पुगेकाहरु भेटिन्छन्

कोहि सँगसँगै हिडेकाहरु छुट्टिन्छन्

भलै गन्तव्य एकै होला

तर फरकफरक हुन्छ जिम्मेवारीको झोला

र मनभित्रको गहिरो अनुभुति ।

कठिन नै त हुन्छ लक्ष्य

घरीघरी उकालो चढ्दा र ओरालो झर्दा

घरीघरी चिसो हुँदा र थकाइ लाग्दा

रोक्नुहुन्न पाइलाहरु काँडा बिझाए पनि

सम्झिएर टलक्क टल्किने हिउँ हेर्ने रहर

अनि भञ्ज्याङ्मा उभिएर सूर्योदयको सुन्दरता हेर्ने अठोट ।

यात्राको लामो दुरि नाप्न

उद्देश्यको अग्लो उचाई भेट्न

खुट्टाको जुत्ता फाटे पनि

सत्य चुक्नुहुन्न

शिरैको शिरफूल झरे पनि

इमान गुम्नुहुन्न

अरुको सुखदुःख औल्याउँदै हिड्ने तिम्रो एक कदम

अरुकै पिडाको निदान खोज्दै हिड्ने मेरो अर्को कदम

लो क्याम्प, हाई क्याम्प र बेस क्याम्प हुँदै चुचुरो पुग्नेछ जरुर

बस्, जारी राख्नुपर्छ यात्रा

जीवित राख्नु है आशा

विश्वस्त छु, नयाँ बिहानी हेर्नलाई

तिमीले जस्तै सपना देख्ने एक स्वप्नद्रष्ता ।

11 Dec 2024