शिक्षक आन्दोलन

 विद्यार्थीको भविष्य अन्योलमै छाडेर

शिक्षकहरु सडकमा

बिरामीको ज्यान अलपत्र पारेर

डाक्टरहरु सडकमै

कर्मचारी, व्यवसायी, पत्रकार, ..

सबै पालैपालो सडकमै ।

सरकार अन्धो भो

बिरामी बाँचे बाँचुन्, मरे मरुन् नि भन्दो हो

सदन बहिरो भो

विद्यार्थीले पढे पढुुन्, नपढे नपढुुुन् नि भन्दो हो

प्रतिपक्षी चर्को भो

सकभर त सरकारै ढालुन् नि भन्दो हो

सवाल जीवनमरणको हुने भो

बिद्यालय र अस्पतालमा राजनीतिकरण धेरै भो

देशमा सधैं जिन्दावाद र मुर्दावाद मात्रै हुने भो

आदरणीय गुरुवर र चिकित्सक गण,

मेरो सादर अनुरोध छ

अब सडकबाटै फ्याट्टै एउटा घोषणा गर्दिनुहोस्

अलिकति त्यागी बनिदिनुहोस्

आआफ्नो गोजीको पार्टी सदस्यता च्यातिदिनुहोस्

र, सडक आन्दोलनलाई सधैंका लागि समापन गर्दिनुहोस् ।

26 April 2025

नेपाल शिक्षक महासंघको आह्वानमा देशैभरीका शिक्षकहरु राजधानी केन्द्रित आन्दोलनमा होमिएको १९औं दिन पुगेको छ । सरकार `नसुने झैं गर्ने´ र महासंघ पनि सरकारले `नसुनी धरै छैन´ भन्ने खालको आआफ्नै मनोबिज्ञानमा अडिग देखिन्छन् ।

आन्दोलन शालीन र शान्तिपूर्ण देखिन्छ । अरुबेला जस्तो चर्को नाराजुलुस, घम्साघम्सी, तोडफोड केहि पनि छैन । बरु विद्यार्थी भर्ना र बार्षिक पठनपाठनमा असर पर्नसक्ने कुरामा शिक्षकहरुको चिन्ता झल्किन्छ । सरकारले छिटोभन्दा छिटो आफ्नो माग सम्बोधन गरिदिए हुन्थ्यो भन्ने चाहना छ । सुदूरपश्चिमको देउडा, मध्य नेपालको झ्याउरे र पुर्बेली लोकभाकाले शिक्षकहरुबीच एकापसमा सामीप्यता बदाएको देखिन्छ । साँस्कृतिक महोत्सवको झल्को दिए झै अनुभुति जो कसैलाई पनि हुनेरहेछ ।

मुगु जिल्लाबाट आउनुभएका शिक्षकहरुको गीत पनि उस्तै शालीन, संयमित र आग्रहपूर्ण सुनिन्छ ।

रारा तालमा पानी छ

अधिकार खोज्ने बानी छ..

देशका महत्वपूर्ण अंगहरुमा आवद्ध पेशाकर्मीहरु बारम्बार पेशागत माग लिएर सडकमा ओर्लिनुपर्ने अवस्था आउनु दुःखद् छ । अहिले शिक्षा, स्वास्थ्य, कृषिजस्ता क्षेत्रहरूलाई सीमित जनशक्तिले मात्रै जेनतेन धानिरहेको तितो यथार्थ छ । यस्तो चुनौतीपूर्ण अवस्थालाई मध्यनजर गर्दै जतिसक्दो चाडो समस्याको दीर्घकालीन समाधान निकाल्न उपयुक्त नीतिनिर्माणकार्यमा लाग्न सरकार गम्भीर बन्नैपर्छ ।

राज्य सबै नागरिकको अभिभावक हो, अभिभावकीय भूमिका निर्वाह गर्नैपर्छ । नागरिकको आत्मसम्मानमा ठेस पुर्याएर संसारको कुनै पनि सरकार सफल हुनसक्दैन । राज्यले उल्टै घुर्की लाउने, बेवास्ता गर्ने, टार्ने, पन्छिने वा पन्छाउने मानसिकताबाट कदापी प्रेरित हुनुहुदैन । सहिलाई `हुन्छ´ र गलतलाई `हुन्न´ भनिदिनुपर्छ ।

राज्य संचालनका लागि पारित हुनुपर्ने आवश्यक कुनै पनि ऐन सडकमा नभई सदनमा गुन्जियोस् । जायज मागको सुनुवाइ र सकारात्मक परिणामका लागि सरकारले फास्ट ट्र्याक बिधि अपनाउने साहस पनि गर्नुपर्छ । यति धेरै शिक्षित जमात र सबल सुरक्षाकर्मी सडकमा हप्तौंसम्म समय खर्चिरहदा देशलाई ठुलो क्षति पुगिरहेको छ । हरेक पेशालाई जिम्मेवार बनाउन कडाइसाथ नियमन हवस् तर सम्मानित र मर्यादित बनाउन राज्यले कुनै कन्जुस्याइँ नगरोस् । शिक्षकहरुलाई पार्टीको कार्यकर्ता वा आन्दोलनकारी नभई विद्यार्थी र समाजकै आदर्श गुरु बन्ने उपयुक्त बाताबरण सिर्जना गरियोस् ।

सरकार र शिक्षक महासंघ दुबैलाई उचित निकासका लागि शुभकामना!

20 April 2025