साथी भन्दै अंकमाल गर्छन्
साथीलाई नै असफल पार्न लागिपर्छन्
साथीकै असफलतालाई आफ्नो सफलता ठान्छन्
रोग धेरै बुझेका भाइरल डाक्टरहरु छन्
रोगी बुझेका अशल डाक्टरहरु ओझेल पर्छन्
बिरामीले शरीर सुम्पिन्छन्, भएजती सम्पत्ति अर्पिन्छन्
सास रहुन्जेल आश, आश मारेपछि रित्तै हृदय गाउँ फर्किन्छन् ।
दिब्य ज्ञान भन्दै दोंगीहरुले शास्त्रीय प्रवचन दिन्छन्
धर्म, नैतिकता सबै खोपडीबाट खोपीमा थन्काउछन्
भगवानको बहानामा अन्धभक्तहरु अर्धपागल झैं उफ्रिन्छन्
अध्यात्म र अहिंसाका नाउँमा कपट र हिंस्रक मन्त्र जपिरहन्छन् ।
राष्ट्रियता एकै भएका जनताहरु छन्
देश एकै भएका फरकफरक नागरिकहरु छन्
चार बर्षमा एकदिन एक निमेष होश गुमाउछन्
भोट हाल्ने दिनबाहेक चारै बर्ष बर्बराइ रहन्छन् ।
मन मुटु दिन्छु भन्नेहरूले नै मुटु छिनेर जान्छन्
रोग सन्चो पार्छु भन्नेहरुले नै असह्य पीडा थपिदिन्छन्
मानवता जोगाउछु भन्नेहरुले नै मानव धर्म ध्वंस गर्छन्
विभेद मेट्छु भन्नेहरुले नै बर्ग बिभाजनको बिउ रोप्छन्
जाग, मेरो समाज!
मेरो देशैभरी यसैगरी
घुमाइफिराई सधैं उनैले उनैलाई रजाइँ गरिरहन्छन् ।
12 Aug 2024
लटरम्मै फल्यो रे झुटको खेती
हिजो जस्तै बेमौसमी
आज त फल्यो, फलेछ
भोलि पो फल्ला कि नफल्ला!?
बेइमानहरुले पदाउने नैतिकता
पुनः सुनिश्चित भो अर्को झुट
चर्को सत्तापक्ष, चर्कै प्रतिपक्ष
गनेर समृद्धिको अंक
घोकेर सुशासनको पाठ
खेर हुने सधैं नागरिक भोट
फेरि मीठो सपनामा तुषारापात
यसरी त देश कहिलेसम्म चल्ला!?
सतिले सरापेको बहानामा
धर्म छाडे, रजगज गरे
नालायक सन्ततिहरु हावी भए ।
नफल्ला कि अब त घरिघरि
भोलि र पर्सीदेखि
झुटैझुटको निकृष्ट खेती ।
3 July 2024
No comments:
Post a Comment