Saturday, December 31, 2011

म रातो-को!

दशैमा टिका थाप्दा
पूर्णिमामा होली खेल्दा
स्कुलमा पहिलो हुँदै
मुहारभरी अविर घस्दा
निधार सधैं रातोले रंगियो
अन्तर्मनमा रातो प्यारो
अनि रातोसङै प्रेम बस्यो
किन कि
मैले बुझेको रातो रङ
प्रगती, सम्रिद्धी, सफलता, उत्साह,.. बधाई
खुशी र जीत थियो ।

बगेको आफ्नै रगत देखें
जिउभरी निरन्तर चलायमान
त्यो झनै प्यारो लाग्यो
रातोको अर्थ सिङो जीवन सोचें ।

गाउँ अन्धकार थियो
चिरेर उज्यालो ल्याउनै थ्यो
शहर सुनसान थियो
बिगुल फुकेर बिउझाउनै थ्यो
उकुसमुकुस त्यो तोदेर
नौलो बिहानी झुल्काउन
लाल-बिगुल फुकिदा दंग थिएँ
यसर्थ कि
मैले बुझेको रातो रङ
चेतना, समानता, स्वतन्त्रता, न्याय,.. आशा
आदर्श र क्रान्ति थियो ।

रातोको अर्थ लाल-क्रान्ति ।
क्रान्तिको अर्थ मानवीयता ।
मानवीयताको अर्थ शान्ति ।

मेरो जंकोट रातो भयो
हर्षले गदगद भएँ
रगतले रोल्पा लपक्क भिज्यो
बिजयको शुभकामना दिएँ
पुरै देश रातोमय भयो
अग्रिम बधाई दिएँ
ठुलै उत्सवको आशा राखेर ।

अफसोच!
परिस्थितीले बदलिदियो कि!
रातोसँग दिग्भ्रमित पो भएछु कि!?
अचेल मभित्र लाल-आतंक पसेकोछ
रातोलाई प्रेम गर्न छाडेर
उल्तै तर्सिएर भाग्छु, भागिरहन्छु ।

ए! राता मान्छेहरु
यस्तो के बिचित्र भैरहेछ?
यो के अनर्थ भैरहेछ?
उहिले त्यस्तो गर्व थ्यो
अहिले यस्तो घ्रिणा छ
रातोको अभिमान हरायो कि!?
मेरै बुझाईमा भ्रम भएछ !?
 
ए! लाल मान्छेहरु
आमुल परिवर्तनको त्यो राँको
तिम्रै स्वार्थको लप्का थ्यो र?
रातो रङको अर्थ
आसुँ, पिडा, हिंसा, झुट,.. दुर्गति
निराशा र ध्वंस हो र ?

अब कसरी सम्बोधन गरुँ?
ए! राता मान्छेहरु
ए! नव-लालबोसहरु
कसरी हेरुँ मैले अब
आफन्तका रक्ताम्य तस्बिरहरु
कुन हृदयले सम्झाउँ अब 
लाल बिधुवाहरु, गर्भे टुहुराहरु
कसरी टेकूँ म
कसरी स्पर्श गरुँ अब 
शोकाकुल मेरा वनपाखाहरु ।

रातोको मोहभङ पश्चात
टिकाउ बिकल्प खोजिरहेछु
क्रान्तिको आधार ईलाकाभित्र
म रातो-को !?
२३ डिसेम्बर, ०११

फुयान्शा, चाइना   

No comments:

Post a Comment