हिलोमा अल्झिएर
ब्यर्थ छ मक्किएको त्यो
यथास्थितिको इन्जिन ।
उग्रवादको ग्राभलमा
हुत्तिदै कुदेको पाङ्राहरु
चोक्टै चोक्टा उछिट्टिएर खिइसक्यो ।
थला परेको गाडी हिड्दैन अब
रुघ्न गाडीले यात्रा गर्दैन अब
दुर्घटनाबाट बच्नलाई
नयाँ नै हुनुपर्छ चालक
नयाँ नै चल्नुपर्छ गाडी ।
समय सापेक्ष मार्ग खनेर
परिवर्तनको गन्तब्य पुग्न
अनुकुल गतिमा गुडाउन सक्ने
चालक खोज्नु छ हामी ।
म फेरी भन्छु,
देश बोक्नलाई थोत्रो गाडीले हुँदै हुन्न
गाडी हाँक्नलाई पुरानै चालकले हुँदै हुन्न ।
यसो भनेकैले अचेल
बिचरा! थोत्रो मालिकहरु
अधिनायकवादी आरोप लाउछन मलाई
यात्रुहरुको सकुशल कामना गर्दा
मनोमानी गरेको ठान्छन
नयाँको पक्षमा बोलेकै कारण
खिलाफमा 'कु' गरेको भन्छन
ठिकै छ, भनुन
त्यो 'कु' नै बनोस
मैले 'कु' नै गर्छु ।
26 Jan 2011
About Me
- Chandra Magar
- Kathmandu, Nepal
- जंकोट-४, रोल्पा, मेरो प्यारो जन्मस्थल । बुवा मैसर घर्ती र आमा मनमाया 'बुढा' घर्ती मगर । उहाँहरु नै हुनुहुन्छ मेरो भगवान, जसले मलाई आफ्नो न्यानो कोखमा जन्म दिनुभयो र यस पुण्य धर्तिमा एउटा जीवन बाँच्ने सौभाग्य दिनुभयो । जेठी दिदी लील कुमारी 'घर्ती' पुन, जेठा दाजु दधिबन्धु घर्ती । माईला दाजु थिर बहादुर घर्ती र कान्छी दिदी उमिरमाला घर्ती 'जमुना' । उहाँहरुकै माया र ममतामयी अँगालोमा लुट्पुतिदै खेल्दै हुर्किएर अहिले २८ बसन्त पार गरिसकेछु । प्रा.बि. जंकोटबाट अ,आ सिक्न थालें, त्यहिबाट ५ कक्षासम्म पढें । बाल उदय मा.बि. माडिचौर, रोल्पा हुँदै जीप्स 'GIPSS' दाङबाट एस.एल.सी. सम्मको पढाई सकाएँ । ललितपुर स्थित आइन्स्टाइन एकेडेमीबाट बिज्ञान संकायमा +२ पुरा गर्दै चिकित्सा बिज्ञानको अध्ययन गर्न चाइनाको शान्दोङ प्रान्त पुगें । अहिले नेपालमा आफ्नो पेशा र साहित्यिक अभ्यासलाई सँगसङै अगाडि बदाउने जमर्को गरिरहेको छु ।
Total visitors
No comments:
Post a Comment