Tuesday, February 9, 2021

कृतज्ञता

जत्ती नै गले पनि पाइतलाहरु 

एकैछिन कष्ट बिसाएर  

गन्तव्य पुग्ने अठोट लिन्छ थकित भरिया । 


चुनौतीपूर्ण अनेकन चक्रपश्चात 

अल्छी झुसिलकीरा

उड्छ एकदिन बनेर नौरङ्गी पुतली । 


मरुभूमि र काँडैकाँडाबीच 

घनघोर प्रतिकुलतामै 

अनुकुल पारेर फुल्छ सुन्दर क्याक्टस । 


जसरी मिल्नु पर्छ बाँच्नलाई 

समय 

प्रकृति र प्रक्रिया 

त्यसरी नै मिल्नु पर्छ हाँस्नलाई 

सम्बन्ध 

साथ र माया । 


उर्जा भर्ने अशल सामीप्यतामा 

प्रेमको सुवास छर्ने आत्मीयतामा 

अपार शक्ति रैछ सृष्टिको 

फुलाउनलाई एउटा मन फूल 

सदावहार फुलिरहने एउटा जीवन फूल । 

२६ माघ, ०७७ 

पुल्चोक, ललितपुर 

जन्मदिनको अवसरमा मलाई माया गरेर शुभकामना र आशिर्वाद दिनुहुने आदरणीय र प्रिय आफ्ना मान्छेहरु प्रति समर्पित 

No comments:

Post a Comment